G.42 - உயர உயர - கவியரங்கம் 30

G.042

இது 2009-இல் எழுதப்பட்டது.

2009-06-28

G.42 - உயர உயர - கவியரங்கம் 30

------------

0-1) --- இறைவணக்கம் --- (வஞ்சி விருத்தம் - மா மா காய் - வாய்பாடு) ---

உயர உயரப் பறந்தன்று
முயலும் பிரமன் முடிகாணாக்
கயமார் சடையாய்; கழல்பாடி
இயலும் பணிசெய்(து) இருப்பேனே.

கயம் ஆர் சடையாய் - கங்கைச் சடையானே; (கயம் - நீர்);

0-2) --- அவைவணக்கம் ---
சந்த வசந்தச் சபையோர்க்கு
வந்த னங்கள்; வாசிக்கும்
இந்தப் பாவில் இருக்கின்ற
எந்தக் குறையும் இயம்புமினே.

இயம்புமின் - சொல்லுங்கள்;

1) --- (அறுசீர் விருத்தம் - மா மா காய் - என்ற அரையடி வாய்பாடு) ---
தவழ்ந்தி ருந்த பருவத்தில்
.. தானே வந்த(து) ஓராசை;
"கவலை இன்றி இருப்பேனே
.. காலில் எழுந்து நின்றுவிட்டால்";
உவகை பொங்கத் தன்காலில்
.. ஒருநாள் எழுந்து நடந்தவுடன்
தவறி விழுந்து புண்பட்டுத்
.. தரையை நொந்து கொள்வானே.

2)
பின்னர் அந்த அண்ணனைப்போல்
.. பெரிய வனாக ஓராசை;
இன்னும் ஈராண்(டு) ஆனாலும்
.. "எட்டி லேனே அவனுயரம்;
என்ன செய்வேன், அவனுந்தான்
.. இங்(கு)உ யர்ந்து விட்டானே"
என்னும் உண்மை உறைத்தவுடன்
.. இன்னல் கொள்ளும் மனந்தானே.

3)
காலம் நில்லா(து) ஓடுவதால்
.. கரிய மீசை முளைத்தவுடன்
சீலம் இன்றிப் பெரியவர்மேல்
.. சீறிப் பாய்தல் செய்வானே
மேலும் கீழும் குதிப்பானே
.. மேதை போல நடிப்பானே
நூலும் கற்றுத் தெளியாமல்
.. நோகப் பேசித் திரிவானே.

4)
அரசு வேலை பெற்றவுடன்
.. அதனைச் செய்ய முனையாமல்
இரவும் பகலும் இலஞ்சத்தை
.. எண்ணி எண்ணி மகிழ்வானே
பரணில் பதுக்கி வைப்பானே
.. பலனைச் சற்றும் நினையானே
பரனை எண்ணா(து) அவம்செய்தே
.. பாவக் குழியில் விழுவானே.

பரன் - கடவுள்;

5)
உயர வேண்டும் என்றஎண்ணம்
.. உதிக்கும் எல்லார் உளத்திலும்தான்;
கயமை பொங்கும் நெஞ்சிருந்தால்
.. கடைசி வரைஇங்(கு) எஞ்சுவது
துயரம் ஒன்றே; எந்நாளும்
.. துணைஇ ருக்கும் நற்பண்பில்
உயர மாந்தர் எண்ணிவிடில்,
.. உலகில் அவர்க்கோர் குறையுண்டோ?

கயமை - கீழ்மை;

6)
பதவி படிப்பு பணமென்று
.. பாரில் கூடக் கூடநெஞ்சில்
மதமும் கூடும் பலருக்கும்
.. மதிகெட் டதனால் வினைகூடும்;
இதனைத் தவிர்க்கும் வழிவினவில்,
.. எளிய முறையொன்(று) இங்குண்டு;
மதனை எரித்தான் அடியாரின்
.. வரலாற் றினைநாம் ஓதுவதே.

மதம் - செருக்கு; வெறி;
மதன் - மன்மதன்;
மதனை எரித்தான் அடியாரின் வரலாறு - சிவனடியார்களின் வரலாறு - பெரியபுராணம்;

7) --- (வஞ்சித்துறை - மா மா) ---
அறிவில் வளர்ந்து
குறியில் சிறந்து
நெறியில் இருந்தால்
செறியும் உயர்வே.

குறி - இலட்சியம்; நோக்கம்;
செறிதல் - மிகுதல் (To increase; to be abundant, plentiful);

வி. சுப்பிரமணியன்

------------- -------------

G.41 - வேடிக்கை மனிதர்கள் -- (அரசியல்வாதி) - கவியரங்கம் 29

G.041

இது 2009-இல் எழுதப்பட்டது.

2009-04-20

G.41 - வேடிக்கை மனிதர்கள் -- (அரசியல்வாதி) - கவியரங்கம் 29

------------

0-1) --- இறைவணக்கம் --- (நாலடித்தரவு கொச்சகக் கலிப்பா) ---

நாடிக்கை தொழுசுரர்க்கா நஞ்சுண்டாய், அன்றயன்மால்
தேடிக்கை தொழுமாறு தீயாகி நின்றவனே;
வேடிக்கை மனிதரினை விருத்தத்தில் எழுதஅருள்;
பாடிக்கை குவித்துன்றன் பதமலரைப் பணிந்தேனே.

சுரர்க்கா - தேவர்களுக்காக;

0-2) --- அவை வணக்கம் --- (அறுசீர் விருத்தம் - மா மா காய் - அரையடி வாய்பாடு) ---
ஆவ லோடு சபையினிலே
.. அமர்ந்தி ருக்கும் அன்பர்காள்
நாவ லர்காள் வணங்குகிறேன்
.. நானு ரைக்கப் போகின்ற
பாவை நீவிர் செவிமடுத்துப்
.. பாராட்(டு) ஐயம் குற்றமென
யாவ தாயி னும்சொல்வீர்
.. யான்நும் பால்வேண் டுவதிதுவே.

ஐயம் - சந்தேகம்;

1) --- (அறுசீர் விருத்தம் - மா மா காய் - அரையடி வாய்பாடு) ---
தமிழன் என்றோர் இனமுண்டு
.. தனியே அவர்க்கோர் குணமுண்டு
நிமிர்ந்து நிற்போம் நாமென்பார்
.. நெருங்கித் தேர்தல் வந்தாலோ
திமிலம் தானே தெருவெங்கும்
.. சேலை வேட்டி வினியோகம்
குமிழி போல மறைந்தொழியும்
.. கூட்டிச் சொன்ன அப்பண்பே.

திமிலம் - ஆரவாரம்;
கூட்டிச் சொல்லுதல் - 1. மிகைப்படுத்திச் சொல்லுதல்; 2. மக்களைத் திரட்டிப் பேசுதல்;

2) --- (கலிவிருத்தம் - விளம் மா விளம் மா - வாய்பாடு) ---
பெற்றவர் வைத்த பெயரினைச் சொல்லி
மற்றவர் அழைத்தல் மதிப்பினுக் கிழிவாம்
சுற்றிய தொண்டர் சொல்கிற பட்டம்
வெற்றுரை விரும்பல் தலைவருக் கழகே.

வெற்றுரை - பொருளற்ற சொல்;

3) --- (எழுசீர் விருத்தம் - விளம் மா விளம் மா விளம் விளம் மா - வாய்பாடு) ---
தலையினைக் கொடுத்தும் தமிழினைக் காப்போம்
.. தாயினும் மதிக்கிறோம் என்பார்;
அலையெனத் தொண்டர் திரண்டுரை கேட்பார்
.. அவர்க்கென உயிரையும் கொடுப்பார்;
பலபெயர் களையும் மாற்றிடும் தலைவர்
.. பண்பொடு தம்தொலைக் காட்சிக்(கு)
உலகினர் உவக்க ஆங்கிலப் பெயரை
.. ஒளிமிக வைத்திடு வாரே.

4) --- (எண்சீர் விருத்தம் - கருவிளம் தேமா கருவிளம் தேமா - அரையடி வாய்பாடு) ---
அடுக்கடுக் காகச் சொற்களைச் சொல்லி
.. அவையினில் நீண்ட உரையினைச் செய்வார்;
தொடுக்கிற சொல்லில் சுவையிருந் தாலும்
.. துளியள வேனும் பொருளதி ராதே;
அடுக்கிற பேரைக் கெடுக்கிற பண்போ
.. அளவிட லாகா வணம்மிக உண்டு;
நடுக்குறு வோர்கள் அடியினில் வீழ
.. நனிமகிழ்ந் தங்கே அவரிருப் பாரே.

பொருளது இராதே - பொருளின்றி (/ உண்மையின்றி) இருக்கும்;
அளவிடல் ஆகா-வணம் - அளவிட இயலாதபடி;

நடுக்குறுதல் - அஞ்சுதல்;

5) --- (அறுசீர் விருத்தம் - மா மா காய் - அரையடி வாய்பாடு) ---
யாதும் ஊரே எல்லாரும்
.. ஆவர் கேளிர் என்றுரைப்பார்;
ஓதும் சொல்லை உடன்மறப்பார்
.. ஊரைப் பிரிக்க வழிசெய்வார்;
சூதும் வாதும் மிக்கிருப்பார்
.. சுயந லத்தைப் பார்த்திருப்பார்;
தீதும் செய்ய அஞ்சாரே
.. சேவை என்றே சொல்வாரே.

6) --- (அறுசீர் விருத்தம் - மா மா காய் - அரையடி வாய்பாடு) ---
இறைவன் இல்லை இல்லையென்பார்;
.. எதற்குப் பூசை அவற்கென்பார்;
குறைவில் லாமல் நாடெங்கும்
.. கூச்சம் சிறிதும் இல்லாமல்
மறைந்த தலைவர்க் கெனச்சிலைகள்
.. வைத்து மாலை அணிவிப்பார்,
பிறந்த நாளில் துதிசெய்து
.. பெரிய பதவி வரம்கேட்பார்.

அவற்கு - அவன்+கு - அவனுக்கு;

7) --- (எண்சீர் விருத்தம் - மா மா மா தேமா - அரையடி வாய்பாடு) ---
வறுமை யாலே வாடும் மக்கள்
.. வாழ்வில் நிலவும் துன்பத் தோடு
வெறுமை எல்லாம் மிக்கி ருந்தும்
.. வேடிக் கையாய் வேடம் போட்டுச்
சிறுமை மிக்க செயல்கள் செய்து
.. சிரிக்க வைக்கும் தலைவர் தம்மைப்
பெறுவ தற்கு நாடு செய்த
.. பெருந்த வத்தை அறிகி லோமே.

வி. சுப்பிரமணியன்

------------- -------------

G.40 - கற்றவன் - சிலந்தி - சிலேடை

G.040

இது 2008-இல் எழுதப்பட்டது.

2008-04-19

G.40 - கற்றவன் - சிலந்தி - சிலேடை

------------

தன்னூலே தன்வேலை என்றிருக்கக் காண்பதால்

இன்னூலே தாங்கி இருப்பதால் - நன்னூல்வாய்

என்றும் ஒழுகுவதால் ஏற்ற‌ம் பெறுசிலந்தி

மன்று புகழ்கற்ற வன்.

சொற்பொருள்:

நூல் - 1. நூல் (yarn, cotton thread, string) / 2. புத்தகம்; சாஸ்திரம்; ஆகமம்;

இன்னூல் - 1. இல்-நூல்; / 2. இன்-நூல்;

இல் - வீடு;

இன் - இனிய;

வாய் = 1. mouth; / 2. வழி (way, path);

ஒழுகுதல் = 1. நீர் பாய்தல்; நீர்ப்பண்டம் சொட்டுதல்; / 2. முறைப்படி நடத்தல்;

நன்னூல் - 1. நல்-நூல்; 2. நன்னூல் என்ற தமிழ்இலக்கணநூல்;

ஏற்றம் = 1. மேல் ஏறுகை; 2. புகழ்; மேன்மை;

மன்று - சபை;

சிலந்தி:

தன் நூலே தன் வேலை என்று இருக்கக் காண்பதால் - தன் நூலால் வலை பின்னுவதே தொழிலாக இருப்பதால்;

இல்-நூலே தாங்கி இருப்பதால் - (அதனுடைய) வீடாக அந்த நூலே அதனைத் தாங்கி இருப்பதால்;

நல்-நூல் வாய் என்றும் ஒழுகுவதால் - நல்ல சக்தியுடைய நூல் அதன் வாயிலிருந்து எப்பொழுதும் வழிவதால்;

ஏற்ற‌ம் பெறு சிலந்தி - புகழ் பெறும் சிலந்தி;

கற்றவன்:

தன் நூலே தன் வேலை என்றிருக்கக் காண்பதால் - (அடுத்தவர் வம்பிற்குப் போகாமல்) தன்னிடம் உள்ள புத்தகத்தைப் படிப்பதே (/ தன் நூல்களை இயற்றுவதே) தன் கருமமாக இருப்பதால்;

இன்-நூலே தாங்கி இருப்பதால் - இனிய புத்தகங்களைக் கையில் ஏந்தி இருப்பதால்;

நல்-நூல்வாய் என்றும் ஒழுகுவதால் ஏற்ற‌ம் பெறு - நன்மை அளிக்கும் அறநூல்களின் வழியே (தர்மத்தின்படி) என்றும் செயல்படுவதால் மேன்மை அடைகின்ற; (நன்னூல் = இலக்கணநூல் என்றும் பொருள்கொள்ளலாம்);

மன்று புகழ் கற்றவன் - அறிஞர்-சபை புகழ்கின்ற கற்றவன்;

வி. சுப்பிரமணியன்

------------- -------------

G.39 - செய்யுள் - எருது - சிலேடை

G.039

இது 2008-இல் எழுதப்பட்டது.

2008-08-20

G.39 - செய்யுள் - எருது - சிலேடை

------------

அசையு மணியு மதுகாட்டும் ஏர்கொண்(டு)

அசையும் அடிநான்கும் ஆகும் - விசைகொண்டும்

செல்லுமாங் காங்கே திரிதலும் காணலாம்

புல்லுண் எருதுசெய்யுள் போல்.

சொற்பொருள்:

அசையுமணியும் - 1. அசையும் அணியும்; / 2. அசையும் மணியும்;

அசை - செய்யுளின் ஓர் உறுப்பு;

அசைதல் - 1. இயங்குதல்; / 2. ஆடுதல்; மெல்லச்செல்லுதல்;

அடி - 1. செய்யுளின் அடி; / 2. பாதம் (கால்);

விசைகொள்ளுதல் - விரைதல்;

திரிதல் - 1. செய்யுள் விகாரங்களுள் ஒன்று (சொல்லின் எழுத்து முதலியன மாறி வரும்); / 2. அலைதல்;

போல் - அசைச்சொல்;

செய்யுள்:

அசையும் அணியும் அது காட்டும்; ஏர்-கொண்(டு)

அசையும், அடி நான்கும் ஆகும்; - விசைகொண்டும்

செல்லும்; ஆங்காங்கே திரிதலும் காணலாம்;

புல் உண் எருது செய்யுள் போல்.

அசையும் அணியும் அது காட்டும் - செய்யுளில் அசை என்ற உறுப்பும், பலவகை அணிகளும் இருக்கும்.

ஏர் கொண்(டு) அசையும் - அழகுடன் இயங்கும்;

அடி நான்கும் ஆகும் - பெரும்பாலும் 4 அடிகள் இருக்கும்.

விசைகொண்டும் செல்லும் - "முடுகு" போன்ற விரைந்துசெல்லும் ஓசைநயங்களும் இருக்கும்.

ஆங்காங்கே திரிதலும் காணலாம் - சில இடங்களில் சொற்கள் திரிந்தும் (மாறியும்) வரக் காணலாம்;

செய்யுள் - தமிழ்ச்செய்யுள்;

எருது:

அசையு(ம்) மணியும் அது காட்டும்; ஏர் கொண்(டு)

அசையும்; அடி நான்கும் ஆகும்; - விசைகொண்டும்

செல்லும்; ஆங்காங்கே திரிதலும் காணலாம்;

புல் உண் எருது செய்யுள் போல்.

அசையு(ம்) மணியும் அது காட்டும் - (கழுத்தில்) அசைகின்ற மணி கட்டப்பட்டிருக்கும்;

ஏர் கொண்(டு) அசையும் - (வயலில்) ஏரை மெல்ல இழுத்துச் செல்லும்;

அடி நான்கும் ஆகும் - நான்கு கால்கள் இருக்கும்;

விசைகொண்டும் செல்லும் - சிலசமயம் வேகமாகவும் ஓடும்;

ஆங்காங்கே திரிதலும் காணலாம் - பல இடங்களில் திரிந்துகொண்டிருப்பதைக் காணலாம்;

புல் உண் எருது - புல்லை உண்ணும் எருது;

வி. சுப்பிரமணியன்

------------- -------------

G.38 - கொசு - குளிர்பானம் (carbonated soft drinks) - சிலேடை

G.038

இது 2008-இல் எழுதப்பட்டது.

2008-07-10

G.38 - கொசு - குளிர்பானம் (carbonated soft drinks) - சிலேடை

------------

காணுமிடம் எல்லாம் களிப்பாய்க் குழாய்கொண்டு

பேணும் மகளிரு டன்மிக வேவருந்தும்

பாணிசைக்கும் பன்னோய் பரப்பும் கொசுபல்பேர்

பூணும் குளிர்பானம் போல்!

சொற்பொருள்:

குழாய் - 1. drinking straw; / 2. கொசுவின் உறுப்பான ரத்தம் உறிஞ்சு குழாய்;

பேணுதல் - 1. விரும்புதல்; / 2. உட்கொள்ளுதல்;

பாண் - பாட்டு - 1. fizz; / 2. கொசுவின் ரீங்காரம்;

பன்னோய் - 1. பல் நோய் - பல்லில் ஏற்படும் நோய்; / 2. பல நோய்கள்;

போல் - அசைச்சொல்;

குளிர்பானம் (carbonated soft drinks):

காணும் இடம் எல்லாம் களிப்பாய்க் குழாய்கொண்டு

பேணும் மகளிருடன் மிகவே அருந்தும்,

பாண் இசைக்கும், பல்-நோய் பரப்பும், கொசு பல்பேர்

பூணும் குளிர்பானம் போல்!

காணும் இடம் எல்லாம் களிப்பாய்க் குழாய்கொண்டு, பேணும் மகளிருடன் மிகவே அருந்தும் - பார்க்கும் இடத்திலெல்லாம், நேசிக்கும் பெண்களோடு, ஸ்ட்ராவைக் கொண்டு உறிஞ்சி மிகவும் குடிக்கின்ற;

பாண் இசைக்கும் - சன்னமாக முரமுர என்று நுரைத்து ஒலி எழுப்புகின்ற (fizzing sound; effervescence);

பல்-நோய் பரப்பும் - பல்லுக்கு கேடு விளைவிக்கின்ற;

பல்பேர் பூணும் குளிர்பானம் - பல பெயர்கள் (brand name, flavors) தாங்கி வருகின்ற குளிர்பானம்;

கொசு:

காணும் இடம் எல்லாம் களிப்பாய்க் குழாய்கொண்டு

பேணும், மகளிர் உடல் மிகவே வருந்தும்,

பாண் இசைக்கும், பல்நோய் பரப்பும், கொசு பல்பேர்

பூணும் குளிர்பானம் போல்!

காணும் இடம் எல்லாம் களிப்பாய்க் குழாய்கொண்டு பேணும் - கண்ட இடத்திலெல்லாம் இஷ்டம்போலத் தன் குழாயால் குத்திக் குருதியைக் குடிக்கும்;

மகளிர் உடல் மிகவே வருந்தும் - (மென்மையான தோல் உடையவர்களாதலால், கொசுக்கடியால்) பெண்கள் உடல் மிகவும் வருந்தும்.

பாண் இசைக்கும் - ரீங்காரம் செய்யும்;

பல்-நோய் பரப்பும் கொசு - பலவகை வியாதிகளைப் பரப்புகின்ற கொசு.

* புணர்ச்சியிலக்கணக் குறிப்புகள்:

1. ஏகாரத்தில் முடியும் சொல்லை அடுத்து உயிர்எழுத்து வந்தால், உடம்படுமெய்யாக வ் / ய் இரண்டுமே தோன்றலாம். (உதாரணம் - சே + அடி = சேவடி);

2. ல்+ம = ன்ம. (முதற்சொல்லின் ஈற்றில் ல் வந்து, அடுத்த சொல் 'ம' வர்க்கத்தில் தொடங்கினால், அந்த ல் ஒற்று ன் ஆகத் திரியும்);

வி. சுப்பிரமணியன்

------------- -------------

G.37 - நாத்திகர் - ஆத்திகர் - சிலேடை

G.037

இது 2008-இல் எழுதப்பட்டது.

2008-01-08

G.37 - நாத்திகர் - ஆத்திகர் - சிலேடை

------------

பொய்யே இலாத பொருள்என்பர் எந்நாளும்

செய்யார் திருத்தாள் வணக்கமே - செய்தார்

இருள்போக்க எண்ணுவர்தான் தோன்றியெல்லாம் என்று

கருதாத்தி கர்நாத்தி கர்.

சொற்பொருள்:

செய் - செம்மை; சிவப்பு;

செய்யார் - 1. செய்யமாட்டார்; / 2. செய் + ஆர் = செம்மை பொருந்திய - சிவந்த;

செய்தார் இருள் - 1. செய்தவர் இருளை; / 2. செய்து ஆர்-இருள்;

இருள் - 1. அறியாமை; அஞ்ஞானம்; / 2. துன்பம் (trouble, difficulty); குற்றம்; பிறப்பு;

ஆர்இருள் - அருந்துன்பம்; பெருந்துன்பம்;

தான்றோன்றி - தான்தோன்றி - 1. தானாகத் தோன்றியது; / 2; (என்றும் இருப்பவனான) கடவுள்;

கருதுதல் - எண்ணுதல்;

நாத்திகர்:

"பொய்யே! இலாத பொருள்" என்பர் - "(கடவுள் என்பது) பொய்தான். கடவுள் என்று ஒன்று இல்லை" என்று சொல்வார்கள்.

எந்நாளும் செய்யார் திருத்தாள் வணக்கமே - ஒருநாளும் அவர்கள் கடவுள் திருவடியை வணங்க மாட்டார்கள்.

செய்தார் இருள் போக்க எண்ணுவர் - (அப்படித் திருவடியை) வணங்குபவர்களது "அஞ்ஞானத்தை"ப் போக்க நினைப்பார்கள்.

தான்தோன்றி எல்லாம் என்று கருது - எல்லாம் தாமே உருவானவை (கடவுளால் படைக்கப்பட்டவை அல்ல) என்று கருதுகின்ற;

நாத்திகர் - நாஸ்திகர்;

ஆத்திகர்:

"பொய்யே இலாத பொருள்" என்பர் - "ஒரு சிறிதும் பொய் இல்லாத பொருள் - மெய்ப்பொருள் (கடவுள்)" என்று சொல்லுவர்.

எந்நாளும் செய் ஆர் திருத்தாள் வணக்கமே செய்து, ஆர்இருள் போக்க எண்ணுவர் - தினந்தோறும் (இறைவனது) சிவந்த திருவடியை வணங்கிப், பெருந்துன்பத்தைப் போக்க எண்ணுவர். (பெருந்துன்பம் - பிறவித்தொடர்ச்சி; "நரகம்" என்றும் பொருள்கொள்ளல் ஆம்);

தான்தோன்றி எல்லாம் என்று கருது - "தான்தோன்றி ஆகிய இறைவனே எல்லாம்" என்று கருதுகின்ற; ( = 1. அவன் சர்வவியாபி - இப்பிரபஞ்சத்தில் எல்லாம் அவன் வடிவமே; 2. தமக்கு உறவெல்லாம் அவனே);

ஆத்திகர் - ஆஸ்திகர்;

பிற்குறிப்புகள்:

1. அப்பர் தேவாரம் - 6.50.6 - "பொய்யிலா மெய்யன்-தன்னை" - பொய் கலவாத மெய்யனாய்;

2. அப்பர் தேவாரம் - 6.21.1 - "மூவுலகும் தாமாகி நின்றார் போலும் ...... தான்தோன்றி அப்பனாரே" - தான்தோன்றி என்பது சிவபிரானுக்குக் காரணப்பெயர். "ஒருவரால் தோற்றுவிக்கப்படாது, தானே தன் இச்சைவழி நினைத்த வடிவில் தோன்றுபவன்" என்பது பொருள்.

வி. சுப்பிரமணியன்

------------- -------------

G.36 - எறும்பு - விமானம் (airplane) - சிலேடை

G.036

இது 2008-இல் எழுதப்பட்டது.

2008-01-06

G.36 - எறும்பு - விமானம் (airplane) - சிலேடை

------------

தரையூர்ந்து காலேறித் தன்வழிச் செல்ல

விரையும் உதவும் மிகவே - இரையும்

சுமந்துசெல்லும் கார்மேலே தோன்றும் வடிவம்

அமைந்த விமானமெறும் பாங்கு.

சொற்பொருள்:

ஊர்தல் - நகர்தல்;

கால் - 1. பாதம்; தூண்; 2. காற்று; வண்டிச் சக்கரம் (Car-wheel, carriage-wheel)

விரை - வாசனை;

விரைதல் - வேகமாகச் செல்லுதல்;

இரை - உணவு;

இரைதல் - ஒலித்தல்;

கார் - 1. கருமை; 2. மேகம்;

வடிவம் - 1. உருவம்; 2. அழகு;

ஆங்கு - 1. அசை; 2. ஓர் உவம உருபு;

எறும்பு:

தரை ஊர்ந்து, கால் ஏறித், தன் வழிச் செல்ல விரையும் உதவும் மிகவே - தரையில் ஊர்ந்து கால்/தூண் இவற்றின்மேல் எல்லாம் ஏறித் தன்னுடைய வழியில் செல்வதற்கு வாசனையும் மிக உதவும்.

இரையும் சுமந்து செல்லும் - தனது உணவைச் சுமந்து செல்லும்.

கார் மேலே தோன்றும் வடிவம் அமைந்த - மேலே கரியநிறம் தோன்றும் உடல் அமைந்த; (பொதுவாகக் கறுப்பாக இருக்கும்).

எறும்பு - ஓர் எறும்பு;

விமானம்:

தரை ஊர்ந்து, கால் ஏறித், தன் வழிச் செல்ல விரையும் - தரையில் ஓடிக், காற்றில் ஏறித், தனது வழியில் விரைந்து செல்லும். ("கால் ஏறி" - என்பதைச் "சக்கரம் உயர்ந்து" என்றும் பொருள்கொள்ளலாம்).

உதவும் மிகவே - நமக்கு மிகவும் பயனுள்ளது.

இரையும் - சத்தம் போடும்.

சுமந்து செல்லும் - மக்களையும் சுமையையும் சுமந்து செல்லும்.

கார் மேலே தோன்றும் - மேகத்தின் மேலே தென்படும். (மேகங்களினும் உயரத்தில் செல்லும்);

வடிவம் அமைந்த விமானம் - அழகிய விமானம்;

வி. சுப்பிரமணியன்

------------- -------------