G.027
இவை 2019-இல் எழுதப்பெற்ற பாடல்கள்.
2019-02-10
G.27 - இலக்கணம் படுத்தும் பாடு (குறும்பா - Limerick)
=============
(Limerick)
(குறும்பா அமைப்பு.
அடிகள் 1, 2, 5 - காய் காய் மா - அடியுள் வெண்டளை. ஓர் எதுகை. அடி ஈற்றில் இயைபு.
அடிகள் 3, 4 - காய் காய் - அடியுள் வெண்டளை. ஓர் எதுகை. அடி ஈற்றில் இயைபு.)
1)
இலக்கணமென் றால்நடுங்கார் ஆரே
கலக்கமது தீர்வழிகா ணாரே
.. புத்தகங்கள் வாசித்தும்
.. நித்தமிக யோசித்தும்
இலக்குதனை என்றுமடை யாரே.
பதம் பிரித்து:
இலக்கணம் என்றால் நடுங்கார் ஆரே?
கலக்கமது தீர்-வழி காணாரே;
.. புத்தகங்கள் வாசித்தும்,
.. நித்த(ம்)மிக யோசித்தும்,
இலக்குதனை என்றும் அடையாரே!
2)
எட்டியுமி லக்கணமும் ஒக்கும்
விட்டுவிட நெஞ்சமும்து டிக்கும்
.. .. புணர்ச்சியெனில் அச்சமென்றோர்
.. .. உணர்ச்சியெழும் இல்லைவென்றோர்
நட்டலும்க னாவினில்ந டக்கும்.
எட்டியும் இலக்கணமும் ஒக்கும் - இலக்கணம் எட்டிக்காய் போல் கசப்பது;
புணர்ச்சி எனில் அச்சம் என்று ஓர் உணர்ச்சி எழும் - புணர்ச்சி விதிகள் என்றால் பயமே தோன்றும்;
இல்லை வென்றோர் - (அதனை) வென்றவர்கள் இல்லை;
நட்டலும் கனாவினில் நடக்கும் - இலக்கணத்தை விரும்புவது கனவில்தான் நிகழும்!
3)
அல்வழிப்பு ணர்ச்சியென்ற போதே
நல்விழிப்பு ணர்ச்சியும்தங் காதே
.. .. தலைகீழாய் நின்றாலும்
.. .. இலையாவும் தின்றாலும்
வெல்வழியைக் காணுதலா காதே.
அல்வழிப்புணர்ச்சி என்ற போதே - "அல்வழிப் புணர்ச்சி" என்ற சொல்லைக் கேட்டதுமே;
நல் விழிப்பு உணர்ச்சியும் தங்காதே - உறக்கம் வந்துவிடும்;
தலைகீழாய் நின்றாலும் - பெருமுயற்சி செய்தாலும்;
இலை யாவும் தின்றாலும் - நினைவாற்றலுக்காகப் பல பச்சிலைகளை உண்டாலும்;
வெல்-வழியைக் காணுதல் ஆகாதே - இலக்கணத்தை வெல்லும் வழியைக் காண முடியாதே.
4)
வினைத்தொகைக்குக் காட்டூறு காயே
அனைத்துலக நூல்களில்பார்ப் பாயே
.. .. தயிர்ச்சோற்றின் நற்றுணையே
.. .. பயில்வோர்க்கும் பொற்றுணையே
மனத்திலிடும் மந்திரமாய் வாயே.
வினைத்தொகைக்குக் காட்டு ஊறுகாயே - வினைத்தொகைக்கு உதாரணம் ஊறுகாய்;
அனைத்து உலக நூல்களில் பார்ப்பாயே - எல்லா இலக்கண நூல்களிலும் இதே உதாரணத்தைக் காணலாம்;
தயிர்ச்சோற்றின் நற்றுணையே - தயிர்ச்சோற்றுக்கு ஏற்றது ஊறுகாய்;
பயில்வோர்க்கும் பொற்றுணையே - கற்போர்க்கும் இது பொன் போன்றது;
மனத்திலிடும் மந்திரம் ஆய்வாயே - இதுவே (தேர்வுகளில்) காக்கும் மந்திரம் என்று உணர்வாயாக!
வி. சுப்பிரமணியன்
------------- -------------
