G.13 - கொசு - அரசன் - சிலேடை

G.013

2008-07-03

G.13 - கொசு - அரசன் - சிலேடை

-------------------------

இரியுமாற் றார்தம் இரத்தம் மிகவும்

பிரியமரிப் பாகுமங்கே பின்னர்; - பரிவாரத்

தோடு பறந்துசென்றங் கங்கடிக்கும் சூரமன்னர்க்(கு)

ஈடு கொசுவென்(று) இயம்பு.

சொற்பொருள்:

இரியுமாற்றார் - 1. இரியும் மாற்றார்; / 2. இரியும் ஆற்றார்;

இரிதல் - தோற்று ஓடுதல்; அஞ்சுதல்

மாற்றார் - பகைவர்;

ஆற்றார் - இயலாதவர்கள்;

இரத்தம் மிகவும் பிரியமரிப்பாகும் - 1. இரத்தம் மிகவும் பிரிய, மரிப்பு ஆகும்; / 2. இரத்தம் மிகவும் பிரியம்; அரிப்பு ஆகும்;

மரிப்பு - சாவு;

பரிவாரம் - படை (Army, body of troops); / சூழ்வோர் (Train, retinue, attendants);

பறத்தல் - 1. விரைந்து போதல்; / 2. காற்றில் பறத்தல்;

அங்கங்கடிக்கும் - 1. அங்கு அங்கு அடிக்கும் / 2. அங்கம் கடிக்கும்;

அடித்தல் - தாக்குதல்; தோற்கடித்தல்; கொல்லுதல்;

அங்கம் - உடல்;

அரசன்:

இரியு[ம்] மாற்றார்தம் இரத்தம் மிகவும்

பிரிய, மரிப்பு ஆகும் அங்கே பின்னர்; - பரிவாரத்தோடு

பறந்துசென்று அங்கு அங்கு அடிக்கும் சூர மன்னர்க்(கு)

ஈடு கொசுவென்(று) இயம்பு.

இரியு[ம்] மாற்றார்தம் இரத்தம் மிகவும் பிரிய, - தோற்று ஓடும் பகைவர்களுடைய இரத்தம் மிகவும் நீங்கிவிட,

மரிப்பு ஆகும் அங்கே பின்னர் - பிறகு அங்கே (போர்க்களத்தில்) மரணம் நிகழும்;

பரிவாரத்தோடு பறந்துசென்று அங்கு அங்கு அடிக்கும் சூர-மன்னர் - (அப்படிப்) படையோடு விரைந்து சென்று பல பக்கங்களில் இருந்து தாக்கிக் கொல்லும் சூரனான மன்னர்;

கொசு:

இரியும் ஆற்றார்தம் இரத்தம் மிகவும்

பிரியம்; அரிப்பு ஆகும் அங்கே பின்னர்; - பரிவாரத்தோடு

பறந்து சென்று அங்கம் கடிக்கும்; சூர மன்னர்க்(கு)

ஈடு கொசுவென்(று) இயம்பு.

இரியும் ஆற்றார்தம் இரத்தம் மிகவும் பிரியம் - (பாதுகாப்பு எதுவும் இன்றி) அஞ்சுகின்ற இயலாதவர்களின் இரத்தத்தை மிகவும் விரும்பும்;

அரிப்பு ஆகும் அங்கே பின்னர் - (கடித்த இடத்தில்) பிறகு அங்கே அரிக்கும்;

பரிவாரத்தோடு பறந்து சென்று அங்கம் கடிக்கும் - தன் கூட்டத்தோடு பறந்து போய் அவர் உடம்பைக் கடிக்கும்.

வி. சுப்பிரமணியன்

------------- -------------