G.5 - தொலைக்காட்சித் தொடர்கள் - (வெண்பா - அந்தாதி)

G.005

2006-11-30

G.5 - தொலைக்காட்சித் தொடர்கள்

-------------------------------------

(வெண்பா - அந்தாதி)

1)

அழுகைத் தொடரைப்போய் ஆனந்தம் என்பார்;

இழுத்(து)இழுத்துச் சோதிப்பார்; இந்தக் - கழுத்தறுப்பைக்

கண்டு மகிழ்ச்சிக் கடலில் திளைக்கின்றார்

பெண்டுகள் பித்துப் பிடித்து.

2)

பிடித்த தொடரில் பிலாக்கணம் கேட்டு

முடிப்பார் முதலில்;பின் சோறு - வடித்திடச்

செல்வார் சிலர்;என்ன செய்வது, தற்காலத்(து)

இல்வாழ்க்கைக் காட்சி இது.

3)

இதற்குப் பிற(கு)என்ன என்(று)அறிய ஆவல்;

அதன்தொடர்ச்சி கண்டால் அதிலும் - முதல்நாள்

அழுகை தொடர்ந்துவரும்; ஐயகோ ஏன்தான்

இழுக்கின்றார் இவ்வா(று) இவர்.

4)

இவரைக் கொலைசெய்வோம் இவ்வாறு; வஞ்சித்(து)

அவளை அழிக்கலாம் அவ்வா(று); - அவமே

தொடர்ந்து வழங்கும் தொலைக்காட்சி காட்டும்

தொடர்களெலாம் நின்றால் சுகம்.

(அவம் - கேடு; பயனின்மை;)

5)

சுகமான வாழ்க்கை, தொடர்கள் இரவு

பகலாய் வருவதென்றார் பக்கத்(து) - அகத்துத்

தலைவி; அவள்கணவர் தாங்க முடியாத்

தலைவலி என்றார் தனக்கு.

6)

தனக்குத் தனித்தொலைக் காட்சியைத் தந்தால்

மனக்கவலை இன்றி மகிழ்ந்து - தினந்தோறும்

இட்டம்போல் பார்த்திடுவேன் எல்லாத் தொடர்களையும்

பட்டணத்துப் பெண்சொன்னாள் பார்.

7)

பார்க்கும் தொடரிலெலாம் பற்றாக் குறைசிரிப்பே;

ஈர்ப்ப(து) அழுகைஒன்றே இங்குப்போல்; - சேர்த்துவைக்கும்

மாமியா ரோடு மருமகளை; ஓலங்கள்

தாமிணைக்கும் என்றால் சகி.

(சகித்தல் - தரித்தல் - பொறுத்தல்).

8)

சகிப்பைப் பெருக்கத் தமிழ்த்தொலைக் காட்சி

மகிழ்ச்சி துளியும் வழங்கா - நிகழ்ச்சி

பலவும் தொடர்ந்து படைக்கும்; அழுகை

விலைகொடுத்து வாங்குகிறோ மே.

9)

மேதினியில் மாதர் விரும்பும் தொடர்களில்

பாதிக்கும் மேலே படுஅழுகை - மீதியில்

காதிலே பூச்சுற்றும் காட்சிகள்; காணாத

போதிருக்கும் நிம்மதி போல்.

(போல் - அசைச் சொல்).

10)

நிம்மதி என்னும் நிகழ்ச்சி கெடுத்திடும்

நம்மன நிம்மதியை; நல்லவராய்ச் - செம்மனப்

பெண்களாய்க் காட்டும் பெருந்தொடர் காண்பதென்(று)என்

கண்கள்தாம்? போது(ம்)அழு கை.

வி. சுப்பிரமணியன்

-------------------------------- -------------------------------